अमेरिकामा फेरि अर्को विमान दुर्घटना, उडेको ३० सेकेन्डमै भवनमा खस्यो एयर एम्बुलेन्स
एजेन्सी : अमेरिकाको पेन्सिलभेनिया राज्यको फिलाडेल्फियामा शनिबार बिहान एउटा सानो मेडिकल विमान दुर्घटना भएको छ।
समाचार एजेन्सी एपीका अनुसार फिलाडेल्फियाबाट मिसौरी जाँदै गरेको विमानमा ६ जना सवार थिए। जसमा दुई डाक्टर, दुई पाइलट, एक बिरामी र एक परिवारका सदस्य थिए।
संघीय उड्ययन प्रशासनका अनुसार लियरजेट ५५ नामको यो विमान उत्तरपूर्वी फिलाडेल्फिया एयरपोर्टबाट साँझ ६ः३० बजे उडेको थियो। त्यसको ३० सेकेन्डपछि ६ दशमलव ४ किलोमिटर दूरीमा दुर्घटनाग्रस्त भयो।
विमान एक आवासीय क्षेत्रका घरहरूमाथि खसेको थियो र यस क्षेत्रका धेरै भवनहरूमा आगो लागेको थियो भने जमिनमा रहेका केही मानिसहरू पनि घाइते भएको एपीएफले जनाएको छ।
फिलाडेल्फियाका मेयर चेरिल पार्करका अनुसार यस दुर्घटनामा धेरै घरमा क्षति पुगेको छ। दुर्घटनामा कति जनाको ज्यान गएको भन्नेबारे हालसम्म एकिन जानकारी छैन।
विमान सञ्चालन गर्ने एयर एम्बुलेन्स कम्पनी जेट रेस्क्युले अहिले कसैको बाँचेको पुष्टि गर्न नसक्ने बताएको छ।
कम्पनीले भन्यो, ‘परिवारका सदस्यहरूलाई सूचित नगरेसम्म कसैको नाम सार्वजनिक गरिने छैन।’
पेन्सिलभेनिया सहरको घना आबादीमा रहेको तीन तले सपिङ सेन्टर रुजवेल्ट मल नजिकै उक्त दुर्घटना भएको हो। विमान खसेको ठाउँमा धेरै घर र पसल छन्।
सामाजिक सञ्जालमा शेयर भइरहेको घटनाको भिडियोमा विमान निकै तीव्र गतिमा तल आएको र ठोक्किएपछि आकाशमा आगोको ठूलो लप्का उठेको देख्न सकिन्छ।
दुर्घटनापछि विमानमा सवार यात्रुहरू बाहिर निस्कन सकेनन् भन्ने अहिले नै स्पष्ट नभएको अमेरिकी यातायात सचिव सन डफीले बताए।
दुई दिनअघि अमेरिकाको राजधानी वासिङ्टन डिसीमा यात्रुवाहक विमान र हेलिकप्टर ठोक्किएर पोटोम्याक नदीमा खस्दा विमानका ६४ र हेलिकप्टरका तीन जनाको मृत्यु भएको थियो। हालसम्म यो विमान दुर्घटनामा मारिएका ४० जनाको शव निकालिएको छ।
दुर्घटनापछि अमेरिकन एयरलाइन्सको विमान पोटोम्याक नदीमा तीन टुक्रा अवस्थामा फेला परेको थियो। विमान र हेलिकप्टर दुवैको फ्लाइट डाटा रेकर्डर (एफडीआर वा ब्ल्याक बक्स) फेला परेको छ।
माघ १९, २०८१ शनिबार ०८:३८:५८ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
