विवादले घेरिएको ‘एक्टर : टेक वन’ देशव्यापी प्रदर्शन गर्न दिने सहमति, अदालतको मुद्दा फिर्ता लिँदै ‘एक्टर’ टिम

काठमाडौं : फिल्म ‘एक्टर’ निर्माता कम्पनी नेपाली डायस्पोरा प्रालिले ‘एक्टर : टेक वन’ फिल्मलाई रिलिज हुन दिने भएको छ।
 
बिहीबार पत्रकार सम्मेलन गर्दै ‘एक्टर’ फिल्मका निर्माता नेपाली डायस्पोरा प्रालि तथा ‘एक्टर : टेक वन’ का संयुक्त निर्माताहरू अदूत फिल्मस् प्रालि तथा मोती फिल्म प्रालिबीच ‘एक्टर : टेक वन’ फिल्मलाई देशव्यापीरुपमा प्रदर्शन गर्न दिने सहमति भएको जानकारी गराए। 

‘एक्टर’का निर्माताले भोलि माघ १८ मा ‘एक्टर : टेक वन’ निर्माताहरू तथा चलचित्र विकास बोर्ड समेतका विरुद्धमा काठमाडौं जिल्ला अदालतमा प्रतिलिपि अधिकार ऐन बमोजिम उचित क्षतिपूर्ति दिलाई पाउँ भनि दायर गरेको मुद्दा फिर्ता लिने सहमति भएको बताए। 

‘एक्टर : टेक वन’का निर्माता मोती कार्कीले दुबै फिल्मका निर्माताबीच लिखित समझदारी भएको बताए। उनले कुन बुँदामा सहमति भएको खुलाएनन्।

गत माघ ४ मा प्रदर्शनमा आएको फिल्म ‘एक्टर’को प्रस्तुतकर्ता कम्पनी नेपाली डायस्पोरा इन्टरटेन्मेन्टको तर्फबाट सम्राट थापाले माघ ११ मा आफ्नो फिल्मको नाम र कथावस्तु चोरी गरेर ‘एक्टर : टेक वन’ निर्माण गरेको भन्दै फिल्मको प्रदर्शन रोक्न माग गर्दै जिल्ला अदालत काठमाडौंमा रिट दायर गरेका थिए।

अदालतले दुबै पक्षलाई माघ २२ मा छलफलमा बोलाउँदै सो अवधीसम्म फिल्म रिलिज नगर्न अन्तरकालिन आदेश जारी गरेको छ।

निर्माता थापाको लगानीमा बनेको फिल्म ‘एक्टर’ गत माघ ४ बाट प्रदर्शनमा आएको थियो। फिल्म हलमा लागेको २ दिनमा नै उत्रिएको थियो। यस फिल्मलाई मदन घिमिरेले निर्देशन गरेका छन्।

सहमतिपछि भने चलचित्र विकास बोर्ड, नेपाल चलचित्र संघ तथा नेपालभरका सम्पूर्ण हलहरुमा उल्लेखित ‘एक्टर–टेक वन’ चलचित्र आजकै मितिबाट प्रदर्शन हुने दाबी गरिएको छ। तर अदालतमा सहमती नभई फिल्म रिलिज गर्न सहज छैन।

यो फिल्मको थिम पोस्टर र ट्रेलर समेत विवादमा तानिएको थियो। फिल्ममा राजबल्लभ कोइराला, प्रदीप खड्का,आना शर्मा, दिव्या रायमाझीलगायतको अभिनय रहेको छ।

यता ‘एक्टर’ फिल्मका निर्माता सम्राट् थापाले आफूले ‘एक्टर : टेक वान’का निर्माता थमन कुमार भण्डारी सहितको टिमसँग फिल्म चल्न दिने सहमति भएको बताए। उनले उकेरासँगको कुराकानीमा आफू पनि फिल्मकर्मी भएको नाताले अर्काको मर्कालाई बुझिदिएको दाबी गरे।

‘मैले शुक्रवार नै अदालतमा मुद्दा हालेको थिए। तर ‘एक्टर : टेक वान’का निर्माता थमन कुमारलाई कसैले केही हुँदैन भनेर उक्साएछन्। नत्र त्यहीँ दिन छलफल भएर कुरा मिल्थ्यो,’उनले भने। 

माघ १७, २०८१ बिहीबार १८:४२:२७ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।