महिला त्रिकोणात्मक सिरिजको पहिलो खेलमा नेदरल्याण्ड्ससँग स्तब्ध बन्यो नेपाल

काठमाडौं : महिला त्रिकोणात्मक सिरिजको पहिलो खेलमा नेदरल्याण्ड्सविरुद्ध नेपाल २० रनले पराजित भएको छ।

नेदरल्याण्ड्सले दिएको १ सय ५८ रनको चुनौती पछ्याएको नेपालले निर्धारित २० ओभरमा ७ विकेट गुमाउँदै १ सय ३७ रन मात्र बनाउन सक्यो।

नेपालकी ओपनर सीता रानामगरले सर्वाधिक २८ रन बनाइन्। यस्तै, कविता जोशीले २७ रन बनाउँदा पूजा महतोले २४ रन थपिन्। रूविना क्षेत्रीले ११ रन बनाउँदा अरूले दोहोरो अंकको रन बनाउन सकेनन्। 

यसअघि त्रिवि क्रिकेट मैदान कीर्तिपुरमा टस हारेर पहिला ब्याटिङमा आएको नेदरल्याण्ड्सले पूरा २० ओभर खेल्दै ४ विकेट गुमाएर १ सय ५७ रन बनाएको थियो। 

उसका लागि आइरिस ज्विलिङ्गले १३ बलमा ३१ रनको विस्फोटक पारी खेल्दा रोबिन राइकले ४८ बलमा ५९ रनको अर्धशतकीय पारी खेलिन्। स्टेरे कालिसले २९ र हिटर सिगर्सले २३ रन जोडिन्।

नेपालका लागि सीता रानामगर, ईश्वरी विष्ट, पूजा महतो र कविता कुँवरले समान एक/एक विकेट लिइन्।

घरेलु मैदानमा नेपालले दोस्रो पटक टी-२० आई सिरिज खेल्न लागेको हो। यसअघि सन् २०२२ को मेमा युगान्डासँग ५ खेलको टी-२० आई सिरिज खेलेको थियो।

सिरिजमा नेपाल र नेदरल्याण्ड्सका साथै थाइल्याण्डको सहभागिता छ। सिरिजमा सहभागी टोलीले एकअर्कासँग समान ३ पटक खेल्नेछन्।

सिरिजमा प्रत्येक टोलीले आपसमा दुई/दुई खेल खेल्नेछन्। जसबाट शीर्ष दुई स्थानमा रहने टोलीबीच उपाधिका लागि प्रतिस्पर्धा हुनेछ।

सिरिज माघ २५ सम्म चल्नेछ। नेपालले अर्को खेल १९ मा थाइल्याण्डसँग खेल्ने छ। 

माघ १७, २०८१ बिहीबार १६:४१:१५ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।