नेपालमा चिनियाँ स्क्यामरको अपहरणमा भारतीय पूर्व प्रहरी योजनाकार : ठमेलबाट अपहरण गरेर भारत लैजाँदा भिमफेदीमै पक्राउ
काठमाडौँ : नेपालमा बसेर भारतमा अनलाइन ठगी गर्ने चिनिया नागरिकलाई भारतीय पूर्व प्रहरीको योजनामा अपहरण गरेर भारत लैजाने योजना असफल भएको छ।
काठमाडौँको ठमेल क्षेत्रबाट भारतीय नागरिकहरूले एक चिनियाँ नागरिकलाई अपहरण गरी गाडीमा जबर्जस्ती राखेको सूचना बेलैमा प्रहरीमा पुग्दा गम्भीर प्रकृतिको क्रस बोर्डर क्राइम सफल हुनबाट जोगिएको हो।
ठमेलको एक होटेलमा बसेका चिनिया नागरिक, जो अनलाइन ठगीमा संलग्न देखिएका छन् उनीसँग ठगीको रकम असुल्न भारतबाट निलम्बित प्रहरीको कमान्डमा आएको टोलीले अपहरण गरेर भारत लैजाने प्रयास गरेको थियो।
नेपालको प्रहरीले समयमै सूचना पाएर सडक मार्गमा चेकिङ बढाउँदा अपहरणमा परेका चिनिया नागरिकको उद्धार सम्भव भयो। अपहरणमा संलग्न भारतीय नागरिक पक्राउ परे।
यस्तो छ घटना
सिसिटिभीमा माघ १ गते अपराह्न १:२५ बजे ठमेलको नर्सिङ चोकमा रहेको होटेल काठमाडौँ स्क्वायर बाहिर भारतीय नम्बर प्लेटको एमएच १६ डीजी ४९०४ को किया ब्रान्ड सेरेन्सका कारमा पाँच जना भारतीय नागरिकले एक चिनियाँ नागरिकलाई जबर्जस्ती राखेको दृश्य कैद हुन्छ।
नेपाल प्रहरीको कन्ट्रोल रुममा अपराह्नतिर कसैले चिनिया नागरिक अपहरणमा परेको सूचना दिन्छन्। एकै पटक जिल्ला प्रहरी परिसर काठमाडौँ र उपत्यका अपराध अनुसन्धान कार्यालयको टोली परिचालन भयो।
सिसिटिभी फुटेजमा चिनिया नागरिकलाई अपहरण गर्न प्रयोग भएको गाडीको नम्बर खुल्यो। प्रहरीले आफ्नो च्यानलमा गाडी नम्बर टिपाएर खोजी सुरु गर्यो। गाडीको लोकेसनका आधारमा त्यो फर्पिङ हुँदै दक्षिणकालीतर्फ लागेको खुल्यो।
खोजी र उद्धार अभियान
प्रहरीले सडकमा ब्लकेट राखेर गाडीको चेकिङ सुरु गर्यो। मकवानपुरको सिस्नेरी र भिमफेदीमा ब्लकेट राखेर चेकजाँच सुरु गर्यो।
सिस्नेरीमा उनीहरू फेला परेनन्। तर भिमफेदीमा एकाएक गाडी छोडेर समूह नै भागे। सबै जङ्गलमा भागेपछि प्रहरी खोजीमा खटियो।
राति ८ बजेदेखि ११ बजेसम्म चलेको सर्च अपरेसनमा प्रहरीले तीन जना भारतीय नागरिकलाई पक्राउ गर्न सफल भयो।
एक भारतीय र अपहरित चिनियाँ नागरिक भिरबाट हाम फालेर भागे। त्यसपछि स्थानीयको सूचनाका आधारमा माघ २ गते बिहान १२:३० बजे फर्पिङमा एक ट्रकबाट अपहरित चिनियाँ नागरिक वु हुवान हुवानलाई प्रहरीले नियन्त्रणमा लियो।
पक्राउ परेका अभियुक्तहरू
प्रहरी अनुसन्धानमा अपहरणमा संलग्न भएकाहरू खुल्यो आशुतोष दत्तात्रय थोरट (३३), महाराष्ट्र, अफसर युनुस शेख (४०), महाराष्ट्र , अमोल खार्माटे (३०), पुने, र अम्बादस सिर्सत (३०), पुने। यसमा एक जना भारतीय नागरिक बिचैमा भाग्न सफल भएको अनुसन्धानमा संलग्न एक प्रहरी अधिकारीले जानकारी दिए।
पक्राउ परेका भारतीय नागरिकमध्ये अफसर युनुस शेख भारतीय प्रहरी संगठनको निलम्बित प्रहरी कर्मचारी रहेको खुल्यो। उनी सन् २०२० मा निलम्बनमा परेका थिए।
अनुसन्धान अधिकारीका अनुसार चिनिया नागरिकलाई ठमेलमा नियन्त्रणमा लिने समयमा उनले आफ्नो भारतीय प्रहरीको पोशाक लगाएको फोटो र भारतीय आधार कार्ड देखाएका थिए।
चिनिया नागरिकले बयानमा प्रहरीको ड्रेसको फोटो देखेपछि डरले उनीहरुसँगै गएको र बाटोमा प्रहरी देखेपछि डरलेे भागेको दाबी गरे।
अपहरणको कारण
प्रहरीको प्रारम्भिक अनुसन्धानबाट खुलेको तथ्य अनुसार यो घटना अनलाइन स्क्याम र ठगीसँग जोडिएको छ। भारतीय नागरिकहरूले २ प्रतिशत कमिसनको लोभमा आफ्ना बैंक खाता र अनलाइन कारोबारको विवरण चिनियाँ नागरिकलाई दिएका थिए। त्यसपछि ती खाताहरू प्रयोग गरी चिनियाले भारतमा करिब ३ करोड रुपैयाँ ठगी गरे।
भारतमा जसको बैंक खाता हो उसै विरुद्ध उजुरी पर्यो। उजुरी परेपछि समस्यामा परेका भारतीय नागरिकहरूले चिनियाँ नागरिकलाई पैसा दिन अनुरोध गरे। पैसा दिन नमानेपछि ठग्ने चिनिया नागरिकलाई भारत लगेर प्रहरीलाई बुझाउने योजना सहित उनीहरू नेपाल आएका थिए।
प्रारम्भिक बयानमा भने भारतीय नागरिकहरूले चिनिया नागरिकले विरगञ्जमा पैसा दिन्छु भनेपछि उनीसँगै एकै गाडीमा गएको दाबी गरेका छन्। चिनिया नागरिकले ठगीमा आफू संलग्न नभएको, ठमेलको एक चिनिया रेस्टुरेन्टमा म्यानेजरको काम गर्ने गरेको दाबी गरेका छन्।
नयाँ सुरक्षा चुनौती
काठमाडौँ राजधानीमा दिनमै भारतीय नगरिकहरुले चिनिया नागरिक अपहरण गरे। यसले नेपालको सुरक्षा व्यवस्थामा गम्भीर चुनौती देखियो नै।
घटना भएको २ घण्टापछि मात्र प्रहरीले जानकारी पाउनु सबैभन्दा गम्भीर विषय हो। पछिल्लो समय नेपाल अन्तर्देशीय अपराधमा खेल मैदान बनिरहेको धेरै घटनाले सार्वजनिक गरिरहेको छ।
यस अगाडि भारतीय अन्तर्राष्ट्रिय आपराधिक सङ्गठन छोटा राजन र दाउद इब्राहिम अनि खुफिया एजेन्सी रअ र आइएसआइको लडाइको मैदान बनेको नेपाल पछिल्लो समय सहज भिसाको सुविधामा नेपाल आएर अन्तर्राष्ट्रिय अपराध गर्ने चिनिया नागरिकका कारण थप जटिल बन्दै गएको देखिन्छ।
धन्न, नेपालको भूमिमा चिनिया नागरिकलाई भारतीय नागरिकले अपहरण गरेर भारत पुर्याउन बनाएको रणनीति सफल भएन। सफल भएको भए यसले अन्तर्देशीय अपराधमा बढाउने चुनौतीसँगै भारत-नेपाल र चीन बिचकै सम्बन्धमा गम्भीर असर पर्ने जोखिम बढाउने थियो।
माघ ३, २०८१ बिहीबार ०१:०३:१८ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
