काठमाडौँ टावरको नक्सा अनधिकृत रूपमा पास गरेको आरोपमा महानगरको प्रमुख प्रशासकीय अधिकृत गुरागाईँ छानबिनमा, हिल्टन होटल पनि शंकामा
काठमाडौँ : १२ तलाका लागि नक्सा पास भएको पुरानो बसपार्कमा निर्माणाधीन काठमाडौँ टावरको १९ तलाको नक्सा अनधिकृत रूपमा पास गरेको आरोपमा काठमाडौँ महानगरपालिकाका प्रमुख प्रशासकीय अधिकृत सरोज गुरागाईँ छानबिनमा तानिएका छन्।
प्रमुख प्रशासकीय अधिकृत गुरागाईँले आधिकारिक नक्सा पास प्रणाली (इबीपिएस) मार्फत प्रक्रिया नै पूरा नगरी नक्सा स्वीकृति गरेको आरोपमा महानगरका मेयर बालेन शाहको निर्देशनमा कारबाही प्रक्रिया सुरु भएको हो।
उनले नक्सा पास गर्ने महानगरपालिकाको इबीपिएस प्रणाली छलेर उनले नक्सा स्वीकृत गरेको देखिएपछि छानबिन सुरु गरेको महानगरको दाबी छ। गुरागाईँ आएपछि विवादित होटल हिल्टनकको समेत नक्सापास भएको थिए। भवन मापदण्ड विपरीत हिल्टनले भवन बनाएर सञ्चालनमा ल्याए पनि महानगरले अनुगमन नगरी भवन सम्पनताको प्रमाण पत्र दिएको थियो।
अहिले भने पुरानो बसपार्कमा टावरको नक्सापासबारे छानबिन सुरु भएको हो। टावर बनाउन महानगरपालिकाले २०७१ फागुन २० र २२ फागुनमा जलेश्वर स्वच्छन्द बिकोई बिल्डर्स प्रालिलाई अनुमति दिएको थियो।
२०७२ साउन २३ मा सूचना प्रकाशित गरेर २०७२ भदौ ६ मा प्लिन्थ लेभलसम्म नक्सा पास भएको र २०७३ साउन ३० जलेश्वर स्वच्छन्द बिकोई बिल्डर्स प्रालि र काठमाडौँ महानगरबिच निर्माणको अवधि पाँच वर्षसहित जम्मा ३० वर्षको लागि डिजाइन निर्माण सञ्चालन र हस्तान्तरणको ढाँचामा दुई पक्षीय सम्झौता भएको थियो।
२०७४ वैशाख ८ मा दुवै पक्षबिच मिति २०७३ वैशाख १३ मा महानगरले स्वीकृत गरेको नक्साभन्दा विपरीतको संरचना निर्माण गर्न नपाइने गरी सहमति पत्रमा हस्ताक्षर भएको थियो।
भवन निर्माण इजाजत जारी सम्बन्धमा दुई तल्ला बेसमेन्ट र जमिन तल्लादेखि १० तल्लासम्म गरी जम्मा १२ तल्लाको निर्माण गर्न नक्सापास गरेकोमा अहिले आएर १९ तलाको नक्सा पास भएको थियो।
जलेश्वर स्वच्छन्द बिकोई बिल्डर्स प्रालिबाट मिति २०८० कात्तिक १ मा नक्सापास म्याद थप तथा नक्सा संशोधन गर्न (भवन निर्माण मापदण्ड २०८० का फार मापदण्ड बमोजिम) निवेदन पेस गरेको थियो।
काठमाडौँ भवन निर्माण मापदण्ड २०७५ परिच्छेद–२ दफा १३ बमोजिम निर्माण सम्पन्न भएको भवनको हकमा हाल कायम रहेको दस्तुर लिई सुपर स्ट्रक्चर नक्सा पास गर्न सकिने व्यवस्था छ।
जलेश्वर स्वच्छन्द बिकोई बिल्डर्स प्रालिले सुपर स्ट्रक्चर नलिइ निर्माण गरेको जम्मा बेसमेन्टसहित १२ तल्लाको लागि जरिवाना लिइ नक्सा पास प्रक्रिया अगाडि बढाइएकोमा विभिन्न समयमा कामपाको आधिकारिक नक्सा पास प्रणाली इबीपिएस मार्फत नक्सा पास प्रक्रिया अगाडि बढाइएको थियो।
प्रक्रिया अनुसार १२ तल्लाको नक्सा पास प्रक्रिया अगाडि बढाउनु पर्नेमा १९ तलाको संशोधित नक्सा पेस गरेको र सो नक्सा प्रमुख कार्यकारीले स्वीकृत गरेका थिए।
महानगरको आधिकारिक प्रणालीमा नक्सा पासको प्रक्रिया विचाराधीनै देखिएको तर भवन निर्माणको नक्सा पास कागजातको अनुमति पत्रमा प्रमुख प्रशासकीय अधिकृत गुरागाईँले नक्सा स्वीकृति गरेको देखिएपछि छानबिन सुरु भएको हो।
पुष ६, २०८१ शनिबार ००:४९:०७ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
