एनपीएल फाइनलको टिकट ‘सोल्ड आउट’, फिजिकल टिकट नबेचिने

काठमाडौं : नेपाल प्रिमियर लिग (एनपीएल)को फाइनल खेलको टिकट सोड आउट भएको छ।

सुदूरपश्चिम रोयल्स र जनकपुर बोल्ट्सबीच शनिबार हुने फाइनल खेलको टिकट खुलेको केही घण्टामै सोल्ड आउट भएको एनपीएलको अफिसियल टिकेटिङ पार्टनर खल्तीले जनाएको छ।

टीयूको कूल क्षमता १२ हजार रहेकोमा नर्मल र भीआईपीतर्फ सबै टिकट बिक्री भइसकेको हो। फाइनलका लागि एनपीएलले सामान्यतर्फ पाँच सय रुपैयाँ र भीआईपीतर्फ एक हजार रुपैयाँ टिकट मूल्य तोकेको थियो।

यसपटक क्यानले दर्शकहरूको सुविधाका लागि जोन छुट्याएर टिकट बिक्री गरेको थियो। बिहीबार साँझ क्यानले टिकट बिक्री खुला गरेकोमा केही घण्टामै सोल्ड आउट भयो।

बिहीबार साँझ नै खल्तीले एक पोस्ट गर्दै मैदानमा फिजिकल टिकट नबेचिने भन्दै अनलाइन टिकट नकाटेका दर्शकलाई घरमै टेलिभिजनमा खेल हेर्न आग्रह गरेको छ।

यद्यपि फ्यानले भने क्यानले आन्तरिक रूपमा टिकट बिक्री गरेर सोल्ड आउट भएको देखाएको आरोप लगाएका छन्। खल्तीको वेबसाइट र एप नै डाउन भएको अवस्थामा पछि खोल्दा सोल्ड आउट देखाएको उनीहरूको तर्क छ।

पुष ५, २०८१ शुक्रबार ०९:४५:४८ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।