बजारमा पैसा अभाव भयो भन्दै मन्त्रिपरिषदबाट जग्गाको कित्ताकाट खुलाउने तयारी, प्रधानमन्त्री भन्छन्' यसले तरलता बढायो

काठमाडौँ : घर-जग्गामा पैसा फसेको भन्दै सरकारले पुरानै भू-उपयोग नीति अनुसार जग्गाको कित्ताकाट खुलाउने तयारी गरेको छ। नयाँ भू उपयोग नीति अनुसार जग्गाको वर्गीकरणपछि मात्रै कित्ताकाट हुनसक्ने उल्लेख छ। यसले घर-जग्गा कारोबारमा प्रभाव परेको भन्दै सरकारले पुरानै पद्धति अनुसार कित्ताकाट खुलाउने तयारी गरेको हो।

सरकारले ल्याएको भू-उपयोग नियमावली अनुसार स्थानीय तहले कृषि र गैर कृषि योग्य जग्गाको वर्गीकरण गरेपछि मात्रै कित्ताकाट गर्न सकिन्छ।

प्रधानमन्त्री पुष्पकमल दाहाल प्रचण्डले नै घरजग्गामा धेरै पैसा फसेकाले अब नयाँ भू-उपयोग नीति अनुसार जग्गा वर्गीकरण नगरी पुरानै स्थितिमा कित्ताकाट खुला गर्ने तयारी भइरहेको सार्वजनिक गरेका हुन्।

सोमबार पोखराबाट आएका उद्योगी-व्यवसायीसँग सिंहदरबारमा भेट गर्दै उनले जग्गामा पैसा फसेकाले बजारमा तरलता अभाव भएको दाबी गर्दै पुरानै स्थितिमा कित्ताकाट खुला गर्न लागेको जानकारी दिए।

उनले कित्ताकाट रोकिँदा बेचबिखन रोकिएको र पुँजीको अभाव हुनुको एक कारण जग्गाको कारोबार नहुनु पनि देखिएको भन्दै कित्ताकाट खुलाउन लागेको बताएका थिए।

'अहिलेलाई जग्गाको वर्गीकरणवाला कुरोलाई थाती राखेर भए पनि पुरानै स्थितिमा लैजाने र कित्ताकाट र जग्गा बेचबिखनलाई मन्त्रिपरिषदबाट सैद्धान्तिक सहमति दिएर अहिलेको सङ्कट व्यवस्थापन गर्ने प्रयास गरिरहेका छौँ,; भेटमा उनले भने।

उनले व्यवसायीहरूसँग ब्याजदरलाई एकल अङ्कमा झार्ने आफ्नो प्रयास भइरहेको र अर्थतन्त्र पहिले भन्दा सुधारतर्फ गएको दाबी गरेका थिए।

चैत २७, २०७९ सोमबार १७:४२:१३ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।