काठमाडौं- ७ मा मतगणना सुरु, प्रतिनिधि सभा र प्रदेश सभाको एकसाथ गणना गरिने

काठमाडौं: काठमाडौं निर्वाचन क्षेत्र नं ७ को मतगणना सुरु भएको छ। काठमाडौं महानगरपालिका वडा नं १६ नयाँबजारस्थित जुडो हलमा मतगणना सुरु गरिएको हो।

सर्वदलीय सहमतिका आधारमा मतगणना थालनी गरिएको निर्वाचन अधिकृत उषा श्रेष्ठले जानकारी दिइन्। चार स्थानमा मतगणना सुरु गरिएको छ भने प्रतिनिधि सभा र प्रदेश सभाको प्रत्यक्ष तथा समानुपातिकको मतगणना एकसाथ अगाडि बढाइनेछ।

मतगणनास्थलमा सुरक्षाकर्मीको बाक्लो उपस्थिति रहेको छ। नेपाल प्रहरी र सशस्त्र प्रहरी बलका सुरक्षाकर्मीले मतगणनास्थलमा सुरक्षा प्रदान गरिरहेका छन्।

मतगणनालाई सुरक्षित बनाउन तारजालीको व्यवस्था गरिएको निर्वाचन अधिृकत श्रेष्ठले जानकारी दिए। गणनास्थलमा उम्मेदवार र राजनीतिक दलको एक/एक जना प्रतिनिधिलाई सहभागी गराइएको छ। सो क्षेत्रमा करिब ६० प्रतिशत मत खसेको थियो।

सो क्षेत्रमा गठबन्धनका तर्फबाट माओवादी केन्द्रकी अस्मिता सिंह (मानुषी) यमि भट्टराई, एमालेका श्यामकुमार घिमिरे, जनता समाजवादी पार्टीका राजेन्द्र श्रेष्ठ, स्वतन्त्र उम्मेदवार रामवीर मानन्धरलगायत प्रतिस्पर्धामा छन्।

मंसिर ५, २०७९ सोमबार ०७:३७:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।