सगरमाथा हाइड्रोले १७१ मेगावाटको दूधकोसी–६ आयोजना निर्माण गर्ने

सोलुखुम्बु: जिल्लाको खुम्बु पासाङल्हामु गाउँपालिका–३ मा १७१ मेगावाट क्षमताको दूधकोसी– ६ जलविद्युत् आयोजना निर्माण हुने भएको छ। निजी क्षेत्रको सगरमाथा हाइड्रोपावरले निर्माण गर्न लागेको सो आयोजना नदी प्रवाही प्रकृतिको हो।

पछिल्ला दिनमा जलविद्युत् आयोजनाको ‘हब’ का रूपमा स्थापित हुँदै गएको जिल्लामा अन्य केही आयोजनासमेत निर्माणमा क्रममा छन्। केही आयोजना भने निर्माण सम्पन्न भई केन्द्रीय प्रणालीमा बिजुली समेत जोडिसकेका छन्।

आयोजनाले सुख्खायाममा २९५ र वर्षायाममा ६८८ गिगावाट घण्टा गरी वार्षिक रूपमा कूल ९८४ गिगावाट घण्टा ऊर्जा उत्पादन गर्नेछ।

दूधकोसी नदी किनारै किनार भएर आयोजना स्थलको पहुँचमार्ग निर्माण हुनेछ। मुख्य संरचना ‘डाइभर्सन वेयर’, ‘अन्डरस्लुइस’, ‘ग्राभेल ट्र्याप’, ‘सेटलिङ’, ‘बेसिन’, ‘हेडरेस पाइप’, ‘हेडरेस टनेल’, ‘सर्ज ट्याङ्क’ र ‘अडिट टनेल’ जस्ता संरचना निर्माण गर्ने लक्ष्य राखिएको छ।

सोलुखुम्बुको पासाङल्हामु गाँउपालिका- ३ मा निर्माण हुने सो आयोजनाको ‘नेट हेड’ ३६७ मिटर रहेको छ। आयोजनाको विद्युत् गृह भूमिगत रहनेछ। तीन वटा ‘फ्रान्सिस टर्बाइन’ रहने आयोजनाबाट उत्पादित बिजुली २२० केभी क्षमताको ६३ किलोमिटर लामो प्रसारणलाइनमार्फत् नेपाल विद्युत् प्राधिकरणको नयाँ खिम्ती सवस्टेशनमा जोडिनेछ।

आयोजनाको कूल लागत रु ३० अर्ब ८० करोड बराबर रहनेछ। आयोजनाको वातावरणीय प्रभाव मूल्याङ्कन प्रतिवेदन तयार भइसकेको छ।

वन तथा वातावरण मन्त्रालयले आयोजनाको उक्त प्रतिवेदन सार्वजनिक गर्दै सम्बन्धित निकाय वा प्रभावित क्षेत्रका बासिन्दालाई राय सुझाव दिन आग्रह गरेको छ। आयोजनाले कूल ८.३ हेक्टर जग्गा प्राप्त गर्नुपर्नेछ।

आयोजनाको निर्माण अवधिमा ५५० जनाले प्रत्यक्ष रोजगारी पाउनेछन्। जैविक वातावरणीय प्रभाव न्यूनीकरणका लागि आयोजनाले १३ करोड ७५ लाख २९ हजार बराबरको रकम छुट्याएको छ।

कात्तिक ६, २०७९ आइतबार १२:३३:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।