दक्षिण कोरियामा रहेका नेपाली युवालाई मधेश प्रदेशमा लगानी गर्न मुख्यमन्त्री राउतको आग्रह

काठमाडौं: मधेश प्रदेशका मुख्यमन्त्री लालबाबु राउतले दक्षिण कोरियामा रहेका युवालाई मधेशमा लगानी गर्न आग्रह गरेका छन्। मधेशी समाज दक्षिण कोरियाले आज आयोजना गरेको दक्षिण कोरियाबाट तराईमा हुनसक्ने लगानी सम्भाव्यता सम्बन्धी भिजुअल अन्तरक्रियामा उनले कृषि, पर्यटन, उद्योग र शिक्षा क्षेत्रमा लगानीका बृहत सम्भावना रहेकाले सो अवसरलाई सदुपयोग गर्न आग्रह गरेका हुन्।

मुख्यमन्त्री राउतले लगानीको वातावरण निर्माण गर्न आफू जिम्मेवार भएर लाग्ने विश्वास दिलाए।

उनले भने, “आफ्नो माटोप्रति तपाईंहरूले देखाउनुभएको सद्भाव अनुकरणीय छ। मधेश सरकारको तर्फबाट तपाईंहरूलाई धन्यवाद दिन चाहन्छु। आउनुस्, लगानी गर्नुहोस्, वातावरण हामी दिन्छौँ। समृद्ध मधेश निर्माणको बाटोमा यहाँको सहयोगको अपेक्षा हामीले गरेका छौँ।”

प्रदेश सरकारले उद्योग ऐनमार्फत लगानीको वातावरण सुनिश्चित गरिसकेको पनि उनले स्पष्ट पारे। कार्यक्रममा दक्षिण कोरियामा रहेका एक सयभन्दा बढी युवाको सहभागिता रहेको थियो।

भदौ २६, २०७९ आइतबार १३:१३:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।