यातायात क्षेत्रमा देखिएको समस्या समाधान गर्न व्यवसायीबीच कार्यगत एकता
काठमाडौंः नेपाल यातायात व्यवसायी राष्ट्रिय महासङ्घ र नेपाल ट्रक यातायात व्यवसायी महासङ्घबीच कार्यगत एकता गर्ने सहमति भएको छ। दुवै संस्थाका पदाधिकारीबीच आइतबार बसेको बैठकले यातायात क्षेत्रको समस्या समाधानका लागि कार्यगत एकता गर्ने निर्णय गरेको हो।
विसं २०७२ मा गठन भएको ‘यातायात व्यवसायी महासङ्घ समन्वय समिति नेपाल’को दुवै महासङ्घका नयाँ पदाधिकारी चयनभएसँगै पहिलो पटक बैठक बसेर कार्यगत एकता गर्ने निर्णय गरेको समितिका संयोजक एवं नेपाल यातायात व्यवसायी राष्ट्रिय महासङ्घका अध्यक्ष विजयबहादुर स्वाँरले जानकारी दिए।
पछिल्लो समय भारतीय मालवाहक ट्रकले सामान आयात गर्दा नेपाली ट्रक व्यवसायी मर्कामा परेका छन् भने सरकारले तोकेको भाडा समेत लिन सकेका छैनन्। यस्तै, सार्वजनिक यातायात क्षेत्रमा पनि थुप्रै समस्या रहेको भन्दै दुवै महासङ्घभित्रका समस्या समाधानका लागि एकताबद्ध भएर अगाडि बढ्ने बैठकले निर्णय गरेको हो।
बैठकमा नेपाल यातायात व्यवसायी राष्ट्रिय महासङ्घका अध्यक्ष स्वाँर, निवर्तमान अध्यक्ष योगेन्द्रनाथ कर्माचार्य, वरिष्ठ उपाध्यक्ष ऐनकुमार शाही, महासचिव डेकनाथ गौतम, नेपाल ट्रक व्यवसायी राष्ट्रिय महासङ्घका अध्यक्ष हीरालाल श्रेष्ठ, निवर्तमान अध्यक्ष राजेन्द्रकुमार श्रेष्ठ, वरिष्ठ उपाध्यक्ष लोकराज पोखरेल, महासचिव राजेन्द्रविक्रम बाँनियालगायतको उपस्थिति रहेको थियो।
साउन १६, २०७९ सोमबार ०८:३८:०० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
